Shahram Sarmadi
is soch men hi marhala-e-shab guzar gaya
dar va kiya to kis liye saaya bikhar gaya
ta-der apne saath raha main zamane baad
be-nam sa sukut tha jab raat ghar gaya
rakhta tha hukm maut ka jo rah-e-vasl men
vo lamha-e-firaq mire Dar se mar gaya
sab raunaqen ba-zid thiin jahan ghar banane ko
vo qarya-e-vajud ḳhalaon se bhar gaya
main bandh hi raha tha ghazal men use abhi
vo zina-e-ḳhayal se niche utar gaya
Leave a Reply