Khumar Mirzada
is ek Dar men ki aḳhir ko TuuT ja.ega
ye aa.ina mire hathon se chhuT ja.ega
main toḌ sakta huun pal men sukut-e-sang-nasab
magar ye dhyan ki ik shaḳhs ruuTh ja.ega
zarur bujh ke rahega ruḳh-e-safar-talabi
ye aabla hai to ik roz phuuT ja.ega
yaqin tha ki koi saneha guzarna hai
guman na tha ki tira saath chhuT ja.ega
ham ek ahd-e-abad-yab ka khara sach hain
hamare saath hamara ye jhuuT ja.ega
Leave a Reply