Shaheen Abbas
ibtida sa kuchh intiha sa kuchh
chal tamasha karen zara sa kuchh
samne se ye ka.enat haTao
ho raha hai mughalta sa kuchh
sar-ba-sar huun salamti ke sar
main huun raftar-o-hadisa sa kuchh
ek ḳhatra hai aane jaane men
is sara men hai dusra sa kuchh
chaak udhaḌta hai ḳhaak ukhaḌti hai
koi hota hai runuma sa kuchh
aur to kuchh nahin hai miTne ko
main hi main huun bana bana sa kuchh
ye sarakte hue zamin pe log
ye gunah sa kuchh aur gila sa kuchh
vaqt par aag vaqt par paani
zindagi bhar ka tajraba sa kuchh
jo na tera hai aur na mera hai
phir vo kya hai tira mira sa kuchh
jab ḳhuda sa koi nahin to kyuun
mas.ala ban gaya ḳhuda sa kuchh
Leave a Reply