Ibtida-E-Ishq Hai Lutf-E-Shabab Aane Ko Hai

ibtida-e-ishq hai lutf-e-shabab aane ko hai

sabr ruḳhsat ho raha hai iztirab aane ko hai

qabr par kis shaan se vo be-naqab aane ko hai

aftab-e-sub.h-e-mahshar ham-rikab aane ko hai

mujh tak us mahfil men phir jam-e-sharab aane ko hai

umr-e-rafta palTi aati hai shabab aane ko hai

haa.e kaisi kashmakash hai yaas bhi hai aas bhi

dam nikal jaane ko hai ḳhat ka javab aane ko hai

ḳhat ke purze nama-bar ki laash ke hamrah hain

kis DhiTa.i se mire ḳhat ka javab aane ko hai

na-umidi maut se kahti hai apna kaam kar

aas kahti hai Thahar ḳhat ka javab aane ko hai

ruuh ghabra.i hui phirti hai meri laash par

kya janaze par mere ḳhat ka javab aane ko hai

bhar ke saaqi jam-e-mai ik aur la aur jald la

un nashili ankhḌiyon men phir hijab aane ko hai

ḳhana-e-tasvir men aane ko hai tasvir-e-yar

aa.ine men qadd-e-amdam aftab aane ko hai

phir hina.i hone vaale hain mire qatil ke haath

phir zaban-e-tegh par rang-e-shahab aane ko hai

gudgudata hai tasavvur chuTkiyan leta hai dard

kya kisi be-ḳhvab ki ankhon men ḳhvab aane ko hai

dekhiye maut aa.e ‘fani’ ya koi fitna uThe

mere qaabu men dil-e-be-sabr-o-tab aane ko hai