Noon Meem Rashid
jism aur ruuh men ahang nahin
lazzat-andoz-e-dil-avezi-e-mauhum hai to
khasta-e-kashmakash-e-fikr-o-amal
tujh ko hai hasrat-e-izhar-e-shabab
aur izhar se maazuri bhi hai
jism neki ke khayalat se mafrur bhi hai
is qadar saada o maasum hai tu
phir bhi neki hi kiye jaati hai
ki dil o jism ke ahang se mahrum hai tu
jism hai ruuh ki azmat ke liye zina-e-nur
mamba-e-kaif-o-surur
na-rasa aaj bhi hai shauq-e-parastar-e-jamal
aur insan hai ki hai jada-kash-e-rah-e-tavil
ruh-e-yunan pe salam
ik zamistan ki hasin raat ka hangam-e-tapak
us ki lazzat se agah hai kaun
ishq hai tere liye naghma-e-kham
ki dil o jism ke ahang se mahrum hai tu
jism aur ruuh ke ahang se mahrum hai tu
varna shab-ha-e-zamistan abhi be-kar nahin
aur na be-sud hain ayyam-e-bahar
aah insan ki hai vahmon ka parastar abhi
husn bechare ko dhoka sa diye jaata hai
zauq-e-taqdis pe majbur kiye jaata hai
tuut jaenge kisi roz mazamir ke taar
muskura de ki hai tabinda abhi tera shabab
hai yahi hazrat-e-yazdan ke tamaskhur ka javab
Leave a Reply