husn-e-surat men garche buud nahin
par kahan ishq ki numud nahin
nisti jalva-gar hai hasti men
kuchh adam ka mire vajud nahin
ham ne avval se dekha aḳhir tak
zaat haq ki nabud-o-bud nahin
tere husn-e-malih ke qurban
kis ke vird-e-zaban durud nahin
mere saaqi ke pesh saghar-e-chashm
shishe ko kab sar-e-sujud nahin
dagh-e-sozan hai jism men vo uzv
sang-e-afat se jo kabud nahin
baagh hai daagh gar na ho laala
bazm vo kya hai jis men uud nahin
bas-ki hai kund naḳhun-e-mizhgan
uqda-e-ashk ki kushud nahin
ham jo kahte the tum se roz ‘vaqar’
juz zarar ashiqi men suud nahin
Leave a Reply