Husn-E-Kafir-Shabab Ka Aalam

Jigar Moradabadi

husn-e-kafir-shabab ka aalam

sar se pa tak sharab ka aalam

araq-alud chehra-e-taban

shabnam-o-aftab ka aalam

vo miri arz-e-shauq-e-behad par

kuchh haya kuchh itaab ka aalam

allah allah vo imtizaj-e-latif

shokhiyon men hijab ka aalam

hama nur-o-surur ki duniya

hama husn-o-shabab ka aalam

vo lab-e-juebar o mausam-e-gul

vo shab-e-mahtab ka aalam

zanu-e-shauq par vo pichhle pahar

nargis-e-nim-khvab ka aalam

der tak ikhtilat-e-raz-o-niyaz

yak-ba-yak ijtinab ka aalam

laakh rangin-bayaniyon pe miri

ek saada javab ka aalam

gham ki har mauj mauj-e-tufan-khez

dil ka aalam hubab ka aalam

dil-e-mutrib samajh sake shayad

ik shikasta rubab ka aalam

vo saman aaj bhi hai yaad ‘jigar’

haan magar jaise khvab ka aalam