Poet
ham ne dekhi vafa saharon ki
ban ga.e dhuul rahguzaron ki
zaḳhm bharne yahan nahin paate
ye to basti hai dil-figaron ki
gham-kadon ke charagh maddham hain
ḳhushk ankhen hain gham ke maron ki
ab to Dasne lage hain raaz hamen
ye inayat hai raz-daron ki
daman-e-gul mila hai sad-para
yuun haqiqat khuli hai ḳharon ki
ashna-e-sitam hue jab se
justuju hai sitam-shi.aron ki
naav ka Dubna lab-e-dariya
tang-zarfi hai ye kinaron ki
‘baḳht’ jashn-e-shikasta-pa.i hai
dhuul raqsan hai rahguzaron ki
Leave a Reply