Shakeel Badayuni
ham hain aur un ki khushi hai aj-kal
zindagi hi zindagi hai aj-kal
gham ka har aalam naya hai in dinon
dil ki har duniya nai hai aj-kal
un ka zikr un ki tamanna un ki yaad
vaqt kitna qimti hai aj-kal
chand bhi hai sogvar-e-hijr dost
phiki phiki chandni hai aj-kal
jal rahi hai dil men sham-e-arzu
gham-kade men raushni hai aj-kal
tu hai aur dariya-dili hai saqiya
main huun aur tishna-labi hai aj-kal
be-qarari karvaton par karvaten
dil ka aalam didani hai aj-kal
arz-e-gham par muskurate bhi nahin
barhami si barhami hai aj-kal
hasil-e-tark-e-mohabbat dekhna
anjuman suuni padi hai aj-kal
dil men aur mayusiyon men ai ‘shakil’
ittihad-e-bahami hai aj-kal
Leave a Reply