Bashir Badr
honton pe mohabbat ke fasane nahin aate
sahil pe samundar ke khazane nahin aate
palken bhi chamak uthti hain sone men hamari
ankhon ko abhi khvab chhupane nahin aate
dil ujdi hui ek sarae ki tarah hai
ab log yahan raat jagane nahin aate
yaaro nae mausam ne ye ehsan kiye hain
ab yaad mujhe dard purane nahin aate
udne do parindon ko abhi shokh hava men
phir laut ke bachpan ke zamane nahin aate
is shahr ke badal tiri zulfon ki tarah hain
ye aag lagate hain bujhane nahin aate
ahbab bhi ghairon ki ada siikh gae hain
aate hain magar dil ko dukhane nahin aate
Leave a Reply