Rehman Musawwir
havas ki aankh men jugnu machalne lagte hain
nazar jhuka ke vo jab haath malne lagte hain
zara si der men shaklen badalne lagte hain
hava ke lams se badal pighalne lagte hain
hai lazmi koi tahrik zindagi ke liye
paḌe paḌe miyan shahtir galne lagte hain
purani barf ka main jab bhi zikr sunta huun
na jaane paanv mire kyon phisalne lagte hain
na.i ravish ye chali hai ki kaaT do baazu
vagarna astin men saanp palne lagte hain
main e’timad se chalta huun asmanon par
magar zamin pe mire paanv jalne lagte hain
Leave a Reply