Hawa-E-Hirs-O-Hawas Se Mafar Bhi Karna Hai

havā-e-hirs-o-havas se mafar bhī karnā hai

isī daraḳht ke saa.e meñ ghar bhī karnā hai

anā hī dost anā hī harīf hai merī

isī se jañg isī ko sipar bhī karnā hai

chal aa tujhe kisī mahfūz ghar meñ pahuñchā duuñ

phir is ke baad mujhe to safar bhī karnā hai

yahī nahīñ ki pahuñchnā hai āsmānoñ par

duā-e-vasl tujhe ab asar bhī karnā hai

hameñ to sham.a ke donoñ sire jalāne haiñ

ġhazal bhī kahnī hai shab ko basar bhī karnā hai

Leave a Comment