hasraton men ab ye ik hasrat hamare dil men hai
itna kah diije ki be-chara baḌi mushkil men hai
ek muusa the ki in ka zikr har mahfil men hai
aur ik main huun ki ab tak mere dil ki dil men hai
aaj kyuun had se siva uljhan hamare dil men hai
kya nasib-e-dushmanan vo bhi kisi mushkil men hai
hai koi aisa jo saaqi se kahe mere liye
ye bhi ik allah ka banda tiri mahfil men hai
ya ilahi ḳhair yuun hamdardiyan hoti hain aaj
jaise mere dil ka saara dard unhin ke dil men hai
dekhna ye hai un ankhon men sama jaata hai kaun
yuun to hone ko zamana bhar tiri mahfil men hai
dekhiye kis ke muqaddar men likhi hai ye bahar
aaj to ik haar phulon ka kaf-e-qatil men hai
dekhiye to apne vahshi ki tasavvur men ḳhushi
ghar men tanha hai magar jaise bhari mahfil men hai
hai mohabbat koi bimari to bimari qubul
haa.e ‘manzar’ kis maze ka dard apne dil men hai
Leave a Reply