hasraten roti rahen dil men mujavir ki tarah
dil magar chup hi raha lauh-e-maqabir ki tarah
ḳhushk patton ki tarah chhuT ga.e yaran-e-kuhan
phir na palTe kabhi patjhaḌ ke musafir ki tarah
aa tiri maang men kuchh ashk pirota ja.un
main to har chhanv se guzrunga muhajir ki tarah
main huun ik naqsh-e-qadam dasht-e-faramoshi ka
bhuul jaoge mujhe tum bhi musafir ki tarah
charagar duur na jaana kahin ji Darta hai
aaj ki raat hai gahri shab-e-aḳhir ki tarah
dushman-e-mehr-o-vafa se koi karta hai nibah
kaun chahega tujhe tere ‘musavvir’ ki tarah
Leave a Reply