Hasin Hain Kis Qadar Manzar Mein KHud Ko Bhul Jata Hun

hasin hain kis qadar manzar men ḳhud ko bhuul jaata huun

tumhare shahr men aa kar main ḳhud ko bhuul jaata huun

nahin rahta zara bhi hosh mujh ko aane jaane ka

tumhare paas men aa kar main ḳhud ko bhuul jaata huun

main kya huun kaun huun rahti nahin kuchh bhi ḳhabar mujh ko

tumhari yaad men aksar main ḳhud ko bhuul jaata huun

mira sona bhi kya hai jagna kya intizar-e-shab

paḌa rahta hai ye bistar men ḳhud ko bhuul jaata huun

ye mera jism meri ruuh us ko saunp di main ne

koi to hai mire andar main ḳhud ko bhuul jaata huun

ajab si ḳhud faramoshi hai mujh par rat-din taari

mire ai dost paḌh mantar main ḳhud ko bhuul jaata huun

na main divana farzana na main parvana ai ‘arpit’

ta.ajjub hai mujhe kyunkar main ḳhud ko bhuul jaata huun