har silsila-e-ġham se shanāsā.ī huī hai
har mauj-e-talātum mirī Thukrā.ī huī hai
zulmat ne kahīñ chaak garebāñ na kiyā ho
aflāk pe rañgīn fazā chhā.ī huī hai
bebāk nigāhī pe jise naaz bahut thā
vo aañkh hameñ dekh ke sharmā.ī huī hai
ik ham ki har uftād pe haiñ mahv-e-tabassum
ik nabz-e-havādis hai ki tharrā.ī huī hai
gulshan meñ khaTaktā hai use merā nasheman
bijlī ḳhas-o-ḳhāshāk pe mañDlā.ī huī hai