har shaḳhs yahan mujh ko bimar sa lagta hai
is shahr men ab jiina azar sa lagta hai
sochon ki dukanen hain yadon ke khilaune hain
siine men mire koi bazar sa lagta hai
dekha tumhen jab se ehsas ke angan men
har jazba-e-ḳhvabida bedar sa lagta hai
ab rah-e-mohabbat men chalna hai bahut mushkil
is raah ka har patthar kohsar sa lagta hai
maana ki tire lab par alfaz to achchhe hain
lekin ye tira lahja talvar sa lagta hai
kuchh shahr ke dukhḌe hain kuchh ghar ke masa.il hain
mujh ko ye tira ḳhat bhi aḳhbar sa lagta hai
halat ne bhar di hai talḳhi si tabi.at men
ab kar-e-suḳhan-sazi dushvar sa lagta hai
dar-asl vo kaisa hai ye ba.ad ki baten hain
chehre se magar ‘shahid’ gham-ḳhvar sa lagta hai
Leave a Reply