har lamha tha sau saal ka Talta bhi to kaise
le aa.i shab-e-gham koi marta bhi to kaise
ik aag thi jo phunk rahi thi do-jahan ko
vo dil se mire ho ke guzarta bhi to kaise
ham pyaas ke maron ne abas aas laga.i
barsa hua badal tha barasta bhi to kaise
gulchin ki nazar taak men rahti thi barabar
ghuncha koi khilta bhi mahakta bhi to kaise
tinke ki rukavaT bhi na thi ghaar ki tah men
phir phaila hua paanv sambhalta bhi to kaise
saaya na koi naqsh-e-qadam kucha na bazar
sahra ke safar men tha bhaTakta bhi to kaise
siine men koi sho.ala na nazron men kahin barq
‘shohrat’ bhala dil mera bahalta bhi to kaise
Leave a Reply