har haal men raha jo tira aasra mujhe
mayus kar saka na hujum-e-bala mujhe
har naghme ne unhin ki talab ka diya payam
har saaz ne unhin ki sunai sada mujhe
har baat men unhin ki khushi ka raha khayal
har kaam se gharaz hai unhin ki raza mujhe
rahta huun gharq un ke tasavvur men roz o shab
masti ka pad gaya hai kuchh aisa maza mujhe
rakhiye na mujh pe tark-e-mohabbat ki tohmaten
jis ka khayal tak bhi nahin hai rava mujhe
kaafi hai un ke pa-e-hina-basta ka khayal
haath aai khuub soz-e-jigar ki dava mujhe
kya kahte ho ki aur laga lo kisi se dil
tum sa nazar bhi aae koi dusra mujhe
begana-e-adab kiye deti hai kya karun
us mahv-e-naz ki nigah-e-ashna mujhe
us be-nishan ke milne ki ‘hasrat’ hui ummid
ab-e-baqa se badh ke hai zahr-e-fana mujhe
Leave a Reply