har ghaḌi qayamat thi ye na puchh kab guzri
bas yahi ghanimat hai tere baad shab guzri
kunj-e-gham men ik gul bhi likh nahin saka puura
is bala ki tezi se sarsar-e-tarab guzri
tere gham ki ḳhushbu se jism o jaan mahak uTThe
saans ki hava jab bhi chhu ke mere lab guzri
ek saath rah kar bhi duur hi rahe ham tum
dhuup aur chhanv ki dosti ajab guzri
jaane kya hua ham ko ab ke fasl-e-gul men bhi
barg-e-dil nahin larza teri yaad jab guzri
be-qarar be-kal hai jaan sukun ke sahra men
aaj tak na dekhi thi ye ghaḌi jo ab guzri
bad-e-tark-e-ulfat bhi yuun to ham jiye lekin
vaqt be-tarah biita umr be-sabab guzri
kis tarah tarashoge tohmat-e-havas ham par
zindagi hamari to saari be-talab guzri
Leave a Reply