Ameer Imam
har ek shaam ka manzar dhuan ugalne laga
vo dekho duur kahin asman pighalne laga
to kya hua jo mayassar koi libas nahin
pahan ke dhuup main apne badan pe chalne laga
main pichhli raat to bechain ho gaya itna
ki us ke baad ye dil ḳhud-ba-ḳhud bahalne laga
ajiib ḳhvab the shishe ki kirchiyon ki tarah
jab un ko dekha to ankhon se ḳhuun nikalne laga
bana ke da.era yaden simaT ke baiTh ga.iin
ba-vaqt-e-sham jo dil ka alaao jalne laga
Leave a Reply