Har Ek Sham Ka Manzar Dhuan Ugalne Laga

har ek shaam kā manzar dhuāñ ugalne lagā

vo dekho duur kahīñ āsmāñ pighalne lagā

to kyā huā jo mayassar koī libās nahīñ

pahan ke dhuup maiñ apne badan pe chalne lagā

maiñ pichhlī raat to bechain ho gayā itnā

ki us ke baad ye dil ḳhud-ba-ḳhud bahalne lagā

ajiib ḳhvāb the shīshe kī kirchiyoñ kī tarah

jab un ko dekhā to āñkhoñ se ḳhuuñ nikalne lagā

banā ke dā.era yādeñ simaT ke baiTh ga.iiñ

ba-vaqt-e-shām jo dil kā alaao jalne lagā

Leave a Comment