har barahman but har ik muslim ḳhuda le ja.ega
mere dar se har mariz apni dava le ja.ega
ḳhud mujhe aana hai tere paas ya burda tira
mere paas aa.ega aur mujh ko uTha le ja.ega
main had-e-fasil tak aa pahuncha jo shauq-e-vasl men
vo had-e-fasil ko aur aage baḌha le ja.ega
mujh ko jaane kis taraf se la raha hai rasta
mujh ko jaane kis taraf ye rasta le ja.ega
apne ghar ke saare darvaze khule rakhta huun main
juz mire is ghar se koi chor kya le ja.ega
a.ina-bini ke ba.ad ‘akash’ ankhon ko sambhal
ek bhi aansu agar Tapka baha le ja.ega
Leave a Reply