Azhar Naiyyar
hamare chehre pe ranj-o-malal aisa tha
masarraton ka zamane men kaal aisa tha
faza-e-shahr men barud ki thi bu shamil
ki saans lena bhi ham ko muhal aisa tha
amir-e-shahr ke honTon pe paḌ ga.e taale
gharib-e-shahr ka chubhta saval aisa tha
ba-vaqt-e-sham samundar men gir gaya suraj
tamam din ki thakan se niDhal aisa tha
tamam ghonsle ḳhali the nange peḌon par
hudud-e-dasht men vaqt-e-zaval aisa tha
vo jab bhi milte hain zaḳhmon ke phuul dete hain
hamara rabta un se bahal aisa tha
zamin pe jhukne lagi ḳhud-ba-ḳhud har ik Daali
daraḳht karb-e-numu se niDhal aisa tha
ḳhud apne aap se bhi main raha huun begana
hisar-e-dil men kisi ka ḳhayal aisa tha
Leave a Reply