Sayed Mujeebul Hasan
ham-safar ab mire pahlu men mira dil na raha
jis men tu garm-e-safar tha vahi mahmil na raha
kis ki ummid pe laḌta phirun tufanon se
muntazir ab mira koi lab-e-sahil na raha
jis pe mar mar ke hamen Dhang se jiina aaya
kya karen ab sar-e-maqtal vahi qatil na raha
ab ḳhayalat ki mahfil bhi nahin saj paati
dil-e-tanha men koi raunaq-e-mahfil na raha
jan-ba-lab yuun bhi mujhe hijr ne kar Daala hai
ai miri maut tira kaam bhi mushkil na raha
aaj ke daur men apnon se shikayat kaisi
saath apna bhi vafa men hamen hasil na raha
naz-o-andaz men hai naḳhvat-o-pindar ki bu
shayad a.ina koi us ke muqabil na raha
be-vafa kitna vafadar raha tera ḳhayal
ek lamha bhi mire haal se ghafil na raha
jo tire husn ka munkir tha vo mazmun kabhi
mere afkar ke unvan men shamil na raha
dhaḌkanon men na koi kaif na halchal hai ‘mujib’
tarz-e-avval ki ravish par dil-e-bismil na raha
Leave a Reply