hairan huun ki ye kaun sa dastur-e-vafa hai
tu misl-e-rag-e-jan hai to kyuun mujh se juda hai
tu ahl-e-nazar hai to nahin tujh ko ḳhabar kyuun
pahlu men tire koi zamane se khaḌa hai
likha hai mira naam samundar pe hava ne
aur donon ki fitrat men sukun hai na vafa hai
shikva nahin mujh ko ki huun mahrum-e-tamanna
gham hai to faqat itna ki tu dekh raha hai
main shahr-o-bayaban men tujhe DhunD chuka huun
be-dard to kis hujla-e-pinhan men chhupa hai
uThti hain jo pahlu se mire dard ki lahren
betab samundar koi siine men daba hai
ai ziist ke dozaḳh se guzarte hue lamho
socha hai kabhi tum ne ki jiina bhi saza hai
ham rakhte hain da.ava ki hai qaabu hamen dil par
tu samne aa jaa.e to ye baat juda hai
ḳhush-baḳht to vo hai jise tu apna samajh le
kahne ke liye yuun to hamara bhi ḳhuda hai
main dozaḳh-e-jan men bhi raha mahv-e-tag-o-taz
yuun kahne ko is umr ka har lamha naya hai
har mauj-e-hava tez faza ta-ba-ufuq tang
dil zarra-e-sahra hai bagulon men ghira hai
ai dasht-e-tamanna men bhaTakte hue aahu
tu kaun hai kis vaqt ki rah dekh raha hai
kyuun jaage hue shahr men tanha hai har ik shaḳhs
ye raushni kaisi hai ki saaya bhi juda hai
kis dast-e-hina-basta ka zevar hai vo ḳhanjar
gham ban ke jo har shaḳhs ke siine men gaḌa hai
Thahra.e use ‘arsh’ koi kaise jafa-kash
jo mujh se alag rah ke bhi hamrah chala hai
Leave a Reply