haa.e kaisi vo shaam hoti hai
dastan jab tamam hoti hai
ye to baten hain sirf zahid ki
kahin mai bhi haram hoti hai
sham-e-furqat ki uljhanen tauba
kis ghazab ki ye shaam hoti hai
ishq men aur qarar kya ma.ani
zindagi tak haram hoti hai
ho ke aati hai jab udhar se saba
kitni nazuk-ḳhiram hoti hai
ye tasadduq hai un ki zulfon ka
meri har sub.h shaam hoti hai
jab bhi hoti hain jannaten taqsim
huur zahid ke naam hoti hai
lamhe aate hain vo bhi ulfat men
jab ḳhamoshi kalam hoti hai
piine vaala ho gar to saaqi ki
har nazar daur-e-jam hoti hai
har ada ham ada-shanason ki
zindagi ka payam hoti hai
vaqt Thahra hua sa hai ‘naushad’
na sahar aur na shaam hoti hai
Leave a Reply