Haal-E-Poshida Khula Saman-E-Ibrat Dekh Kar

hal-e-poshida khula saman-e-ibrat dekh kar

padh liya qismat ka likkha lauh-e-turbat dekh kar

is qadar be-khud hua asar-e-vahshat dekh kar

aina se naam puchha apni surat dekh kar

dekhiye mahshar men bhi surat dikhae ya nahin

subah bhagi hai shab-e-hijran ki zulmat dekh kar

jam-e-kausar dast-e-saqi men nazar aaya mujhe

uth gaya ankhon ka parda abr-e-rahmat dekh kar

raat din ke makhmase se ai junun paai najat

ablaq-e-ayyam bhaga meri vahshat dekh kar

tere kuche men tira jalva nazar aaya mujhe

sane-e-jannat ko dekha bagh-e-jannat dekh kar

munh hamara jalva-e-didar ke laaeq kahan

apni surat dekhte hain teri surat dekh kar

chaar divar-e-anasir par safedi phir gai

ankhen raushan ho gaiin teri sabahat dekh kar

vahshat-e-dil hashr ke din bhi rahe ka.vus talab

kante DhunDhe ham ne sahra-e-qayamat dekh kar

chahchahe bulbul ke avaz-e-kaf-e-afsos hon

rang-e-gul ud jaae mera dagh-e-hasrat dekh kar

abr udhar aaya idhar mai-khvaron ka beda hai paar

kashti-e-mai mol ke dariya-e-rahmat dekh kar

aansu ponchhe yaad aaya jab javani ka maza

ankhen malte rah gae ham khvab-e-rahat dekh kar

barahman kaaba men aaya shaikh pahuncha dair men

log be-vahdat hoe hain teri kasrat dekh kar

har ghadi aati hai kanon men ye avaz-e-jaras

kaun duniya se safar karta hai saaat dekh kar

nashsha ke asbab-e-tazin men bhi nashsha hai zarur

meri ankhen chadh gaiin mai-khane ki chhat dekh kar

ab nahin nazuk-mizaji se tavajjoh ka dimagh

ai ajal aana kabhi hangam-e-fursat dekh kar

vo muvahhid huun na rakkha dusre se ittihad

ruuh ne chhoda badan ko zidd-e-vahdat dekh kar

khun-e-bulbul se magar sincha hai bagh-e-dahr ko

ham lahu barsate hain phulon ki rangat dekh kar

tere bande sar jhukate hain buton ke samne

sajde karta huun ilahi teri qudarat dekh kar

zakhmi-e-tegh-e-taghaful par nazar jamti nahin

chashm-e-sozan band hoti hai jarahat dekh kar

ji laga kar ye ghazal kis tarah kahiye ai ‘munir’

bujh gaya dil kuch-e-manzil ki azimat dekh kar

Leave a Comment