Saud Usmani
guzar chali hai shab-e-dil-figar aḳhiri baar
bichhaḌne vaale hain yaron se yaar aḳhiri baar
damak raha hai sahar ki jabin pe bosa-e-shab
thapak rahi hai saba ru-e-yar aḳhiri baar
zara si der ko hai pattiyon pe shisha-e-nam
guzar rahi hai kiran ar-par aḳhiri baar
ye baat ḳhemon ke jalte diye bhi jante the
ki ham ko bujhna hai tartib-var aḳhiri baar
kisi alaav ka sho.ala bhaḌak ke bolta hai
safar kaThin hai magar ek baar aḳhiri baar
sumon se uḌti hui reg-e-dasht DhunDhti hai
ghubar hote hue shahsavar aḳhiri baar
Leave a Reply