Guzar Chali Hai Shab-E-Dil-Figar aaKHiri Bar

guzar chalī hai shab-e-dil-figār āḳhirī baar

bichhaḌne vaale haiñ yāroñ se yaar āḳhirī baar

damak rahā hai sahar kī jabīñ pe bosa-e-shab

thapak rahī hai sabā rū-e-yār āḳhirī baar

zarā sī der ko hai pattiyoñ pe shīsha-e-nam

guzar rahī hai kiran ār-pār āḳhirī baar

ye baat ḳhemoñ ke jalte diye bhī jānte the

ki ham ko bujhnā hai tartīb-vār āḳhirī baar

kisī alaav kā sho.ala bhaḌak ke boltā hai

safar kaThin hai magar ek baar āḳhirī baar

sumoñ se uḌtī huī reg-e-dasht DhūñDhtī hai

ġhubār hote hue shahsavār āḳhirī baar

Leave a Comment