gulab mange hai ne mahtab mange hai
shu.ur-e-fan to lahu ki sharab mange hai
vo us ka lutf-o-karam mujh ghariq-e-isyan se
gunah mange hai aur be-hisab mange hai
havas ki baaḌh har ik bandh toḌna chahe
nazar ka husn magar intiḳhab mange hai
kahan ho kho.e hue lamho! lauT kar aao
hayat umr-e-guzishta ka baab mange hai
mire kalam men ta.us bhi hai shahin bhi
sinan ke saath mira fan rubab mange hai
chaḌha raha hai salibon pe ham ko sadiyon se
zamana phir bhi muqaddas kitab mange hai
na jaane kitni ghaTa.en uThi hain rahon men
magar hai pyaas ki har dam sarab mange hai
hai zaḳhm-ḳhurda mire dil ka aa.ina aisa
ḳhirad ki tegh se thoḌi si aab mange hai
vo meri fahm ka leta hai imtihan shayad
ki har saval se pahle javab mange hai
bikhar gaya tha jo kal raat kirchiyon ki tarah
miri nigah vo TuuTa sa ḳhvab mange hai
karamat us se jo puchhun ki zindagi kya hai
javab dene ke badle hubab mange hai
Leave a Reply