ghuTan bhi dekh rahi hai mujhe hairani se
kahin main uub hi ja.un na us javani se
saza-e-maut nahin umr-qaid kaTo.ge
ye hukm aa hi gaya dil ki rajdhani se
zara sa ishq kiya aur ab ye halat hai
vo bah raha hai ragon men ajab ravani se
udasiyon men bhi shikva bhala karen kis se
bacha hai kaun mohabbat men ra.egani se
kabhi kabhi to mujhe ḳhud pe hansi aati hai
mujhe ye ishq hua bhi to ik divani se
main koshishon men huun ik jism ko banane ki
hava se aag se miTTi se aur paani se
udaas ho chuka kirdar chiḳh kar bola
mujhe nikal do ab is dukhi kahani se
Leave a Reply