ghuTan Bhi Dekh Rahi Hai Mujhe Hairani Se

ghuTan bhī dekh rahī hai mujhe hairānī se

kahīñ maiñ uub hī jā.ūñ na us javānī se

sazā-e-maut nahīñ umr-qaid kāTo.ge

ye hukm aa hī gayā dil kī rājdhānī se

zarā sā ishq kiyā aur ab ye hālat hai

vo bah rahā hai ragoñ meñ ajab ravānī se

udāsiyoñ meñ bhī shikvā bhalā kareñ kis se

bachā hai kaun mohabbat meñ rā.egānī se

kabhī kabhī to mujhe ḳhud pe hañsī aatī hai

mujhe ye ishq huā bhī to ik divānī se

maiñ koshishoñ meñ huuñ ik jism ko banāne kī

havā se aag se miTTī se aur paanī se

udaas ho chukā kirdār chīḳh kar bolā

mujhe nikāl do ab is dukhī kahānī se

Leave a Comment