gham-e-kaun-o-makan hai aur main huun
nishat-e-javedan hai aur main huun
qafas men bhi maze men kaT rahi hai
ḳhayal-e-ashiyan hai aur main huun
kahan ka rahbar aur kaisi manzil
ghubar-e-karvan hai aur main huun
chaman hai fasl-e-gul hai chandni hai
hadis-e-dil-baran hai aur main huun
nigah-e-barq hai aur ashiyan hai
nigah-e-baghban hai aur main huun
ma.al-e-imtihan kya jaane kya ho
musalsal imtihan hai aur main huun
‘sa.id’ ab kaam kya dair-o-haram se
dar-e-pir-e-mughan hai aur main huun
Leave a Reply