afzal-minhas

Gahra Sukut Zehn Ko Behaal Kar Gaya

gahra sukut zehn ko behal kar gaya

sochon ke phuul phuul ko pamal kar gaya

suraj ne apni aanch ko vapas bula liya

lekin mire lahu ko vo sayyal kar gaya

kya faisla diya hai adalat ne chhodiye

mujrim to apne jurm ka iqbal kar gaya

jo log duur the vo bahut duur ho gae

ye taaza hadisa bhi gaya saal kar gaya

sahme hue hain charon taraf raushni ke aks

ik haath aa ke surkh kai gaal kar gaya

main do qadam chala tha ki Dhalvan aa gai

‘afzal’ safar to mera bura haal kar gaya

More Poems

Leave a Comment