Shahzad Ahmad
fasl-e-gul ḳhaak hui jab to sada di tu ne
ai gul-e-taza bahut der laga di tu ne
teri ḳhushbu se mire dil men khile dard ke phuul
so ga.i thi jo bala phir se jaga di tu ne
meri ankhon men andhere ke siva kuchh bhi na tha
is ḳharabe men ye kya sham.a jala di tu ne
zindagi bhar mujhe jalne ke liye chhoḌ diya
sabz patton men ye kya aag laga di tu ne
koi surat bhi riha.i ki nahin rahne di
aisi divar pe divar bana di tu ne
main tire haath na chumun to ye na-shukri hai
daulat-e-dard tamanna se siva di tu ne
kabhi kah duun to zamana mera dushman ho jaa.e
dil ko vo baat bhi chup rah ke bata di tu ne
vo tire paas se chup-chap guzar kaise gaya
dil-e-betab qayamat na uTha di tu ne
ise kahne ke liye lafz kahan se aa.e
dastan-e-shab-e-gham kaise suna di tu ne
us ko bhi us ki nigahon men bahut ḳhaar kiya
apni tauqir bhi miTTi men mila di tu ne
kaash vapas tujhe goya.i na milti ‘shahzad’
bol kar aaj bahut baat baḌha di tu ne
Leave a Reply