Fasl-E-Gul Kab luTi Nahin Malum

Bekal Utsahi

fasl-e-gul kab luTi nahin malum

kab bahar aa.i thi nahin malum

ham bhaTakte rahe andhere men

raushni kab hui nahin malum

kab vo guzre qarib se dil ke

niind kab aa ga.i nahin malum

dard jab jab uTha hua mahsus

choT kab kab lagi nahin malum

bebasi jis ki ziist ho us ko

ziist ki bebasi nahin malum

naaz sajdon pe hai hamen lekin

nazish-e-bandagi nahin malum

apni halat pe tere vahshi ko

kyuun hansi aa ga.i nahin malum

hosh aaya to mai-kada na raha

haa.e kis vaqt pi nahin malum

meri janib vo dekh kar bole

hai koi ajnabi nahin malum

daur-e-hazir ki bazm men ‘bekal’

kaun hai aadmi nahin malum