faqirana tabi.at thi bahut bebak lahja tha
kabhi mujh men bhi hansta-khelta ik shaḳhs rahta tha
bagule hi bagule hain miri viran ankhon men
kabhi in rahguzaron men koi dariya bhi bahta tha
tujhe jab dekhta huun to ḳhud apni yaad aati hai
mira andaz hansne ka kabhi tere hi jaisa tha
kabhi parvaz par meri hazaron dil dhaḌakte the
dua karta tha koi to koi ḳhush-bash kahta tha
kabhi aise hi chha.i thiin gulabi badliyan mujh par
kabhi phulon ki sohbat se mira daman bhi mahka tha
main tha jab karvan ke saath to gulzar thi duniya
magar tanha hua to har taraf sahra hi sahra tha
bas itna yaad hai soya tha ik ummid si le kar
lahu se bhar ga.iin ankhen na jaane ḳhvab kaisa tha
Leave a Reply