Sabir Waseem
ik safar par use bhej kar aa ga.e
ye guman hai ki ham jaise ghar aa ga.e
vo gaya hai to ḳhushiyan bhi saari ga.iin
shaḳh-e-dil par ḳhizan ke samar aa ga.e
laakh chaho magar phir vo rukte nahin
jin parindon ke bhi bal-o-par aa ga.e
ham to raste pe baiThe hain ye soch kar
jo ga.e the agar lauT kar aa ga.e
us se mil ke bhi kab us se mil paa.e ham
biich men ḳhvahishon ke shajar aa ga.e
us ne us paar apna basera kiya
ham ne dariya ko chhoḌa idhar aa ga.e
ek dushman se milne ga.e the magar
ik mohabbat ke zer-e-asar aa ga.e
Leave a Reply