ik lamha-e-visal se aage nikal ga.i
main ḳhvahishon ke jaal se aage nikal ga.i
chehre pe us ke ranj ke asar dekh kar
chup-chap har saval se aage nikal ga.i
kuchh main bhi na-shanas thi is kar-e-ḳhair men
har ranj har malal se aage nikal ga.i
aise gham-e-hayat ne banhon men le liya
main apni dekh-bhal se aage nikal ga.i
kuchh din tire visal ne mad.hosh kar diya
main ḳhvahish-e-ma.al se aage nikal ga.i
tu bhi mire vajud se azad ho gaya
main bhi tire ḳhayal se aage nikal ga.i
Leave a Reply