Maqsood Afaq
ik ghaḌi jazba-e-nafrat ke siva chahti hai
zindagi tujh se mohabbat ki dua chahti hai
kya karun dost to itne bhi nahin hain mere
roz ye ruuh koi zaḳhm naya chahti hai
kya ajab taur se karti hai shikast apni qubul
ab ye duniya koi hangama bapa chahti hai
jis mohabbat ke labon se kabhi jhaḌte the gulab
ab vahi lahja-e-ashufta-nava chahti hai
jaan ko zaḳhm-e-tamanna se ifaqa na hua
phir na.e ishq men paiman-e-vafa chahti hai
shohraten Dhal ga.iin ik umr ki manind so ab
mauj-e-rusva.i mire ghar ka pata chahti hai
mere honTon ki tamanna bhi ajab hai ‘afaq’
us ke ruḳhsar pe ik phuul khila chahti hai
Leave a Reply