ek divane ko aaj aa.e hain samjhane ka.i
pahle main divana tha aur ab hain divane ka.i
aql baḌh kar ban ga.i thi dard-e-sar jaate kahan
aa ga.e divangi ki had men farzane ka.i
saari duniya aa rahi hai dekhne ke vaste
sar-phiron ne ek kar Daale hain virane ka.i
kya hamare daur ke kuchh piine vaale uTh ga.e
aaj ḳhali kyon nazar aate hain paimane ka.i
mujh ko chup rahna paḌa sirf aap ka munh dekh kar
varna mahfil men the mere jaane pahchane ka.i
kis tarah vo din bhula.un jis bure din ka sharik
ek bhi apna nahin tha aur begane ka.i
main vo kashi ka musalman huun ki jis ko ai ‘nazir’
apne ghere men liye rahte hain but-ḳhane ka.i
Leave a Reply