Ek Din Larans Bagh Mein

baitha hua huun subh se larense-bagh men

afkar ka hujum hai mere dimagh men

chhaya hua hai chaar taraf baagh men sukut

tanhaiyon ki god men leta hua huun main

ashjar baar baar Darate hain ban ke bhuut

jab dekhta huun un ki taraf kanpta huun main

baitha hua huun subh se larense-bagh men

larense-bagh kaif o latafat ke khuld-zar

vo mausam-e-nashat vo ayyam-e-nau-bahar

bhule hue manazir-e-rangin bahar ke

afkar ban ke ruuh men meri utar gae

vo mast giit mausam-e-ishrat-fishar ke

gahraiyon ko dil ki gham abad kar gae

larense-bagh kaif o latafat ke khuld-zar

hai asman pe kaali ghataon ka izhdiham

hone lagi hai vaqt se pahle hi aaj shaam

duniya ki aankh niind se jis vaqt jhuk gai

jab kaenat kho gai asrar-e-khvab men

siine men ju-e-ashk hai mere ruki hui

ja kar use baha.unga kunj-e-gulab men

hai asman pe kaali ghataon ka izhdiham

afkar ka hujum hai mere dimagh men

baitha hua huun subh se larense-bagh men

Leave a Comment