Ek Daman Mein Phul Bhare Hain Ek Daman Mein Aag Hi Aag

ik daman men phuul bhare hain ik daman men aag hi aag

ye hai apni apni qismat ye hain apne apne bhaag

raah kathin hai duur hai manzil vaqt bacha hai thoda sa

ab to suraj aa gaya sar par sone vaale ab to jaag

piiri men to ye sab baten zahid achchhi lagti hain

zikr-e-ibadat bhari javani men jaise be-vaqt ka raag

auron par ilzam-tarashi fitrat hai ham logon ki

sach puchho to paal rakhe hain ham ne khud zahrile naag

yahin pade rah jaenge sab maal khazane dhan-daulat

maut padi hai tere pichhe bhaag sake tu jitna bhaag

hirs-o-hava ki is duniya se bach ke raho to achchha hai

behtar hai shiraz ki davat se bas rukhi roti saag

Leave a Comment