ek dam us ne juda ki na naqab-e-ariz
na hua duur shab-e-vasl hijab-e-ariz
kis pe barham hain buton ka jo bana hai chehra
kis pe la.ega ghazab aaj itab-e-ariz
lala-o-gul hain zamin par to falak par mah-o-mehr
lekin in men se nahin koi javab-e-ariz
dekh kar jalva-e-ruḳhsar hua main behosh
tez kis darja thi allah sharab-e-ariz
sho.ala-e-tur gul-e-tar mah-o-ḳhurshid-e-falak
ashiqon men tire kya kya hain ḳhitab-e-ariz
na diya mus.haf-e-ruḳhsar ka bosa ham ko
us ne kholi na shab-e-vasl kitab-e-ariz
Leave a Reply