dusra ruḳh nahin jis ka usi tasvir ka hai
mas.ala bhule hue ḳhvab ki ta.abir ka hai
chand qadmon se ziyada nahin chalne paate
jis ko dekho vahi qaidi kisi zanjir ka hai
jo bhi karna hai faqat dil ki tasalli ke liye
vaqt tahrir ka hai aur na tadbir ka hai
tum mohabbat ka use naam bhi de lo lekin
ye to qissa kisi haari hui taqdir ka hai
ye jo chalne nahin paate tiri janib dar-asl
jaldi jaldi men kahin Dar hamen taḳhir ka hai
bilkul aise mujhe hasil hai himayat sab ki
har koi jaise taraf-dar yahan hiir ka hai
Leave a Reply