duniya vahi hai aur vahi saman-e-zindagi
lekin badalte rahte hain unvan-e-zindagi
kya kaam kar raha hai ye mehman-e-zindagi
bharta hai kyuun gunah se daman-zindagi
vahshat-nasib hai sar-o-saman-zindagi
ulfat men taar taar hai daman-zindagi
hai dekhne ki chiiz bhi kuchh dekhta hai kya
sair-e-jahan hai ḳhvab-e-pareshan-e-zindagi
kaafi hai apne vaste ara.ish-e-vajud
ara.ishon se paak hai daman-zindagi
maujon se khelta hua bahar nikal na ja
aḳhir ye kis liye gham-e-tufan-e-zindagi
ik din hayat-o-maut ki is khinch-tan men
hathon se chhuT ja.ega daman-e-zindagi
marna hi jab jahan men hai jiine ka ma-hasal
nahaq uTha.en kis liye ehsan-e-zindagi
samjhe hue the ham jise aish-o-tarab ka ghar
zindan-e-gham bana hai vo aivan-e-zindagi
piiri chalegi kya miri piiri ke daur men
aa.e kahan se pahli si ab shan-e-zindagi
hai fasl-e-gul ka zor baharon pe hai shabab
kya pur-faza hai aaj gulistan-e-zindagi
kis se vafa ki dahr men ‘ḳhushtar’ umiid hai
ahd-e-vafa se duur hai paiman-e-zindagi
Leave a Reply