duha.i hai tiri tu le ḳhabar o la-makan vaale
chaman men ro rahe hain ashiyan ko ashiyan vaale
bhaTak sakte nahin ab karvan se karvan vaale
nishani har qadam par dete jaate hain nishan vaale
qayamat hai hamara ghar hamare hi liye zindan
rahen paband ho kar ashiyan men ashiyan vaale
mire sayyad ka allahu-akbar ro.ab kitna hai
qafas men bhi zaban ko band rakhte hain zaban vaale
yahi kamzoriyan apni rahen to ai ‘qamar’ ik din
makanon men bhi apne rah nahin sakte makan vaale
Leave a Reply