abbas-tabish

Dub Kar Bhi Na Pada Farq Giran-Jaani Mein

Duub kar bhi na pada farq giran-jani men

main huun patthar ki tarah bahte hue paani men

ye mohabbat to bahut baad ka qissa hai miyan

main ne us haath ko pakda tha pareshani men

raftagan tum ne abas Dhong rachaya varna

ishq ko dakhl nahin maut ki arzani men

ye mohabbat bhi vilayat ki tarah rakhti hai

halat-e-hal men ye halat-e-hairani men

is liye jal ke kabhi raakh nahin hota dil

ye kabhi aag men hota hai kabhi paani men

ik mohabbat hi pe mauquf nahin hai ‘tabish’

kuchh bade faisle ho jaate hain nadani men

More Poems

Leave a Comment