dosti apni kisi se na shanasa.i hai
zindagi ek musalsal shab-e-tanha.i hai
husn inayat hai rifaqat hai masiha.i hai
ishq ibadat hai parastish hai jabin-sa.i hai
raaz mahsus hai is darja ki mere dil men
ḳhud tamasha hai vo aur ḳhud hi tamasha.i hai
jis ke piine men baqa jis ke pilane men savab
meri taqdir men zahid vo sharab aa.i hai
ham se mil lete hain ye un ki dil-ara.i hai
duur ja baiThte hain ham yahi dana.i hai
ankhon ankhon men pila di mire saaqi ne mujhe
ḳhauf-e-zillat hai na andesha-e-rusva.i hai
hamd-e-bari hai mohabbat jo usi se ho jaa.e
jis ko maḳhsus koi apni ada bhaa.i hai
vo mujhe dekh ke parde men jo chhup jaate hain
main samajhta huun mohabbat mujhe raas aa.i hai
nisf sad-sal se bhi zyada hui umr tamam
aur kis din ke liye un ki masiha.i hai
dil men rakhte hain harifon se chhupa kar mujh ko
un ko ma.alum hai rahbar mira sauda.i hai
Thiik urdu abhi likhni bhi nahin aa.i hai
aisi kam-ilmi pe kya ḳhuub ye goya.i hai
meri aadat hai vafa dil men shakeba.i hai
baat yuun bargah-e-naz men ban aa.i hai
Leave a Reply