divana bana degi tire pyaar ki ḳhushbu
inkar se aati hui iqrar ki ḳhushbu
ji kahta hai kanTon ko bhi honTon se laga luun
har phuul se aati hai lab-e-yar ki ḳhushbu
main ne to faqat ret pe ik naam likha tha
sahra ki havaon men hai gulzar ki ḳhushbu
is shahr men ḳhushbu ke ḳharidar bahut hain
allah bacha.e tire kirdar ki ḳhushbu
rusva.i ke tohfe se navaze ga.e aksar
har shaḳhs ki qismat men kahan pyaar ki ḳhushbu
‘ma.asum’ lage honge jinhen zaḳhm-e-mohabbat
mahsus karenge mire ash.ar ki ḳhushbu
Leave a Reply