dil pe jo guzre hai mere aah main kis se kahun
kya karun main ai mire allah main kis se kahun
jab na tum hi hal-e-dil mera kabhi aa kar suno
to ye farmao mujhe, allah main kis se kahun
mere sahib ke zara se rabt par bigden na ghair
ghair se tum se jo kuchh hai raah main kis se kahun
dosto ab kahne sunne se nahin kuchh faeda
vo to mere gham se hai agah main kis se kahun
yuun hi nahaq sar phirate hain mira aa aa ke log
haal apna ai but-e-gumrah main kis se kahun
be-qarari ka sabab apni kahun kis se ‘nizam’
dil pe jo hai sadma-e-jan-kah main kis se kahun
Leave a Reply