dil ne jab bhi tira khayal kiya
khud ko aina-e-jamal kiya
dil ki dhadkan men bas gaya aise
saans lena mira muhal kiya
main ne sach bolne ki jurat ki
sach suna aap ne kamal kiya
teri yaden miri muhafiz hain
teri yadon ko main ne Dhaal kiya
teri chahat ke lamhe lamhe ko
dil ne manind-e-mah-o-sal kiya
vaqt ne kab use rakha zinda
kaam jis ne jo be-maal kiya
teri qurbat men biite lamhon ne
mujh ko bhi sahab-e-jamal kiya
aaine ne tira qasida kaha
aaina jab kabhi misal kiya
ek hi tha javab husn ke paas
husn se jis ne bhi saval kiya
zindagi ka hai saneha ‘rumi’
dil ki tanhai ne niDhal kiya